Goshverir eru tímabundnir og lífaldur þeirra er háður jarðfræðilegum eiginleikum umhverfisins. Goshverir eru venjulega í tengslum við eldfjöll. Þeir gjósa vegna þess að grunnvatnið sem er í jörðinni nær suðumarki áður en það kemst til yfirborðsins. Hitastigið verður til þess að vatnið breytist í gufu og við það þenst það snöggt út og þeytir vatninu sem er ofar í rásinni langt upp í loft. Þrýstingurinn sem er á svæðinu þar sem vatnið er hitað gerir suðumark vatnsins miklu hærra en við eðlilegan þrýsting í andrúmsloftinu. Frægasta goshverasvæði Íslands er Geysissvæðið í Biskupstungum og þar er að finna tvo þekktustu goshveri hérlendis Geysi og Strokk.